Hvernig er hagkvæmast að nota farsímann á ferðalögum erlendis?
Margir farsímanotendur gera sér ekki grein fyrir því hvernig gjaldfært er fyrir símnotkun þeirra erlendis.
Á heimasíðum símafyrirtækjanna eru nokkuð greinagóðar upplýsingar um reikisamninga og gjaldskrár erlendra símafyrirtækja sem samið hefur verið við. Rétt er þó að benda notendum á að ofan á uppgefna gjaldskrá erlenda símafyrirtækisins leggst jafnan þjónustugjald og 25,5% virðisaukaskattur.
Sjá góð ráð um farsímanotkun erlendis.
Hvert beini ég kvörtun ef ég tel póst- eða fjarskiptafyrirtæki brjóta gegn skyldum sínum samkvæmt lögum?
Póst- og fjarskiptastofnun tekur við kvörtunum frá neytendum telji þeir að fjarskiptafyrirtæki eða póstrekandi brjóti gegn þeim skyldum sínum sem kveðið er á um í lögum eða almennum heimildum og rekstrarleyfum.
Hægt er að fylla út og senda rafrænt kvörtunareyðublað hér á vefnun.
Einnig er hægt að sækja textaeyðublað til útfyllingar hér (Word skjal). Vistið, fyllið út og sendið með tölvupósti, faxi eða bréfapósti til PFS.
Er í lagi að panta radíótæki, t.d. talstöð eða fjarstýrð leikföng, á Netinu ?
Það getur verið í lagi, en rétt er að vera vel á varðbergi, til þess að komast hjá vandræðum, þegar varan kemur til landsins.
Aðeins má setja radíótæki, sem eru CE-merkt, á markað á Evrópska efnahagssvæðinu. Ef vara er keypt frá útlöndum á Netinu, er seljandinn að setja vöruna á markað hér á landi og gilda því sömu reglur og um vöru, sem seld er í verslunum hér á landi.
CE-merkingin felur í sér yfirlýsingu frá framleiðanda um að varan sé ætluð til notkunar í Evrópu.
Radíóbúnaður, t.d. talstöðvar og fjarstýrð leikföng, sem er leyfður og almennt notaður utan Evrópu en framleiðandinn hefur ekki ætlað beint til notkunar í Evrópu, er því ólöglegur og notkun hans óheimil hér á landi. Sjá meira um kaup á tækjum.
Á að tilkynna um truflanir, t.d. í sjónvarpi, til Póst- og fjarskiptastofnunar ?
Já. Tilkynna skal til PFS, ef rökstuddur grunur er um að ólöglegar útsendingar trufli fjarskipti, t.d. sjónvarpsmóttöku.
PFS á að tryggja að fjarskipti séu truflanalaus og hefur það hlutverk að miða út og stöðva rekstur ólöglegra truflanavalda í ljósvakanum.
Ef vart verður truflana á sjónvarpsmóttöku telur PFS hins vegar eðlilegt að fyrst sé leitað til fagmanna, þ.e. þeirra sem bera ábyrgð á loftnetslögnum í húsinu. Ef þeir komast að þeirri niðurstöðu með mælingum að ólöglegar sendingar séu í loftinu, skulu þeir tilkynna um það til PFS með því að fylla út rafrænt eyðublað hér á vefnum. Einnig er hægt að tilkynna um truflanir með tölvupósti eða í síma 822-1596.
Hvað er alþjónusta í póst- og fjarskiptum?
Til alþjónustu teljast þeir þættir póst- og fjarskipta sem boðnir eru öllum neytendum á viðráðanlegu verði, óháð landfræðilegri staðsetningu þeirra.
Hvað er IP fjarskiptaþjónusta?
IP fjarskiptaþjónusta er sú fjarskiptaþjónusta sem veitt er yfir almenn IP net, s.s. tölvupóstþjónusta, vefþjónusta, nafnaþjónusta, skráaflutningur og spjallrásir. Ennfremur rekstrarþættir t.d. vistun léna og skráning IP neta.
Fjarskiptaþjónusta: Þjónusta sem að nokkru eða öllu leyti felst í því að beina merkjum um fjarskiptanet, þ.m.t. tölvupóstþjónusta og netaðgangur
Hvað er ENUM?
ENUM er skammstöfun á Electronic Numbering eða rafrænar færslur á símanúmerum yfir á Internetið. Rafræn yfirfærsla símanúmera byggir á alþjóðlegum símanúmerastaðli E 164 sem Alþjóðafjarskiptastofnunin ITU hefur sett. Samkvæmt honum eru í hverju símanúmeri landanúmer, svæðisnúmer innanlands og 5 stafa talnaruna fyrir heimilissímann. Í yfirfærslu yfir á Netið er þessari talnarunu snúið við og bætt við staðalheitinu e164 og viðskeytinu .arpa sem tryggir forgangsflutning á Netinu. Dæmi: 0.0.5.5.8.7.6.4.5.3.e164.arpa
Hægt er að hala niður af Netinu einfaldum hugbúnaði sem þýðir símanúmer notendans yfir í lén eða netfang og sendir það síðan sem símamerki til lénþjóns.Lénþjóninn sendir merkið á milli léna og þar með er hægt að nota það til upphringinga í tölvum og koma á talsambandi yfir Netið. Meira um ENUM.