Reiknivél PFS er verkfæri fyrir neytendur þar sem hægt er að bera saman verð á þjónustuleiðum fjarskiptafyrirtækjanna fyrir heimasíma, farsíma og nettengingar. Reiknivélin er ekki ætluð til að sannreyna símareikninga einstakra notenda.
Á vefnum www.reiknivél.is eru leiðbeiningar, upplýsingar um forsendur útreiknings og notkunarreglur.
Hér fyrir neðan eru nánari upplýsingar um reiknivélina, tilgang hennar, forsendur og virkni.
Smelltu á hlekkina hér fyrir neðan til að komast beint í það efni sem þú vilt fá upplýsingar um.
Tilgangur
- Upplýsingagjöf til neytenda
- Verðsamanburður á þjónustuleiðum fjarskiptafyrirtækja fyrir farsíma, heimasíma og nettengingar.
- Aukið gegnsæi á flóknum markaði með því að aðstoða fólk við að átta sig á verðlagningu mismunandi þátta fjarskiptanotkunar.
- Reiknivélin er ekki ætluð til að sannreyna símareikninga einstakra notenda.
Hvað gerir Reiknivél PFS?
Reiknivél PFS ber saman verð á þjónustuleiðum fjarskiptafyrirtækjanna fyrir eftirtalda einstaklingsþjónustu:
- Heimasíma (venjulegan fastasíma)
- Farsíma (áskrift og frelsi)
- ADSL nettengingar (gagnamagn sótt af erlendum vefþjónum)
Tekur reiknivélin tillit til allrar notkunar og kostnaðarþátta þegar verð eru borin saman?
Reiknivél PFS tekur tillit til einingaverðs með virðisaukaskatti í verðskrám fjarskiptafyrirtækjanna og algengustu notkunar.
Hér fyrir neðan er hægt að sjá hvaða þátta reiknivélin tekur tillit til og hvaða þættir eru ekki með í vélinni.
Reiknivél PFS tekur tillit til:
- Innanlandsnotkunar sem algengust er í farsíma og heimasíma (þegar hringt er/skilaboð send milli venjulegra síma).
- Gagnamagns af erlendum netþjónum í ADSL nettengingum (Ekki er greitt fyrir sótt gagnamagn af innlendum netþjónum né það sem sent er.
- Afsláttar ef hann er óskilyrtur, t.d. þegar ákveðinn fjöldi mínútna innan kerfis eða óháð kerfi er innifalinn í þjónustuleið.
- Umframgjalds, þ.e. þess gjalds sem greitt er umfram raunlengd símtals þegar rukkað er fyrir hvert byrjað gjaldtökuskref. Algengasta gjaldtökuskrefið á Íslandi er 60 sekúndur.
Dæmi:
Fyrirtæki rukkar fyrir hverja byrjaða mínútu þannig að notandi sem hringir og talar í 1 mín. og 3 sek. borgar fyrir 2 mínútur alveg eins og sá sem talar í 1 mín. og 50 sek.
Sjá nánari upplýsingar um tímamælingar.
- Tölfræðilegra upplýsinga um meðallengd og meðalfjölda símtala á Íslandi
- Upplýsinga PFS um markaðshlutdeild fjarskiptafyrirtækja á viðkomandi mörkuðum
Reiknivél PFS tekur ekki tillit til:
- Pakkatilboða
Ekki er tekið tillit til pakkatilboða, t.d. þar sem gefinn er heildarafsláttur vegna fleiri en einnar tegundar þjónustu, eða þegar veittur er afsláttur af einni tegund þjónustu gegn kaupum á annarri. Samsetning pakka er mjög fjölþætt og illa samanburðarhæf og því er ekki tekið tillit til þeirra í reiknivélinni.
- Afsláttar sem er einstaklingsbundinn eða sértækur
Ekki er tekið tillit til sérkjara sem bundin eru ákveðnum notanda, t.d. vinanúmera sem notandi velur sjálfur.
- Símtala til útlanda
Verð símtala til útlanda er mjög fjölbreytt og mismunandi milli símafélaganna. Verð á þessum símtölum tekur einnig örum breytingum og sérkjör eru í boði með nokkurs konar vinanúmerum í útlöndum. Sömuleiðis er fjöldi almennra neytenda sem hringir mikið til útlanda hlutfallslega lítill. Það myndi því flækja reiknivélina óþarflega mikið að taka símtöl til útlanda með inn í hana.
- Símatorga, talhólfsnotkunar og annarrar mögulegrar sérþjónustu
Hjá símafyrirtækjunum er fjölbreytt þjónusta í boði sem viðskiptavinir nýta sér í misjöfnum mæli. Mjög mismunandi er hvort eða hvernig slík þjónusta er gjaldfærð og er því litið fram hjá slíkum þáttum í reiknivélinni.
- Kostnaðar sem greiddur er í eitt skipti, t.d stofngjalds.
- 3G netþjónustu fyrir farsíma og tölvur
o Notendur eru enn hlutfallslega fáir og nota þjónustuna lítið, a.m.k. enn sem komið er. Því er hún ekki tekin með í þessari útgáfu reiknivélarinnar.
o Áskriftarkjör 3G þjónustu eru ekki að fullu samanburðarhæf við áskriftarkjör fyrir hefðbundna internetþjónustu sem veitt er um ADSL tengingar.
o PFS fylgist grannt með þróun á þessu sviði fjarskiptamarkaðarins eins og öðrum og mun taka þessa þjónustu inn í reiknivélina þegar tilefni er til.
- Þjónustu um ljósleiðaratengingar
Nettengingar og önnur þjónusta sem veitt er um ljósleiðaratengingar er enn sem komið er einungis í boði á mjög takmörkuðum svæðum. Því er ekki tilefni til að bera slíka þjónustu saman við hefðbundna ADSL þjónustu sem boðin er um nær allt land.
FARA EFST Á SÍÐU
Af hverju er ekki hægt að sannreyna raunverulega símareikninga í reiknivélinni?
Reiknivélin er ekki ætluð til að sannreyna símareikninga einstakra notenda eða fjarskiptafyrirtækja, heldur er hún tæki til að bera saman verð á þjónustuleiðum fjarskiptafyrirtækjanna og gengur út frá einingaverði. Reikningar fjarskiptafyrirtækja til viðskiptavina sinna eru mismunandi í framsetningu og upplýsingar á þeim mismiklar. Einnig bjóðast neytendum ýmis afsláttarkjör sem bundin eru einstökum notendum eða notendahópum í viðskiptum við fjarskiptafyrirtækin. Hér fyrir neðan eru taldir upp þeir þættir sem valda því að nokkur munur getur verið á raunverulegum símareikningi og niðurstöðum reiknivélarinnar þegar tölur af raunverulegum reikningnum eru settar inn.
- Pakkatilboð
Ekki er tekið tillit til pakkatilboða, t.d. þar sem gefinn er heildarafsláttur vegna fleiri en einnar tegundar þjónustu, eða þegar veittur er afsláttur af einni tegund þjónustu gegn kaupum á annarri. Þar sem samsetning pakka er mjög fjölþætt og illa samanburðarhæf er ekki tekið tillit til þeirra í reiknivélinni.
- Vinanúmer
Vinanúmer er sértækur afsláttur sem bundinn er einstökum notendum og því er ekki tekið tillit til þeirra í reiknivélinni.
- Umframgjald
Símafyrirtækin rukka fyrir símtöl í fyrirfram ákveðnum tímaskrefum, oftast 60 sek (1 mínúta). Þannig er rukkað fyrir hverja byrjaða tímaeiningu. Þegar notandi hringir og talar í 1 mín. og 15 sekúndur er hann þannig rukkaður fyrir 2 mínútur. Hann borgar því það sama fyrir símtal sem er 1 mín. og 2 sekúndur og símtal sem er 1 mín. og 50 sek, þ.e. greitt er fyrir 2 mínútur.
Reiknivélin miðar við meðaltal í umframgjaldinu og gengur út frá að rukkað sé að meðaltali fyrir tæplega hálft gjaldskref umfram raunlengd hvers símtals. Ekki er víst að þetta meðaltal falli að raunnotkun hvers og eins símnotanda.
Þess ber að geta að þessi umframgjaldtaka er ákvörðun símafyrirtækjanna og gjaldtímabilin geta verið mismunandi á milli þeirra. Einnig er mismunandi hvort raunlengd símtala kemur fram á símareikningum auk þeirrar lengdar sem greitt er fyrir.
Sjá nánar um tímamælingar.
- Dreifing á lengd símtala byggist á meðaltölum
Reiknivélin miðar við ákveðna meðallengd símtala. Ekki er víst að raunnotkun hvers og eins falli að því meðaltali. Dreifing símtala í stutt og löng símtöl hefur mismunandi kostnað í för með sér. Hátt upphafsgjald gerir stutt símtöl hlutfallslega dýrari en löng og áðurnefnd umframgjaldtaka getur einnig fallið þungt á stutt símtöl og gerir þau dýrari en ella.
- Símafélög þeirra sem hringt er í - mismunandi verð
Símtöl, sérstaklega í farsíma, eru á mismunandi verði eftir því hjá hvaða símafyrirtæki viðtakandinn er. Reiknivélin miðar við að símtöl endi hjá símafyrirtækjunum í hlutfalli við fjölda viðskiptavina þeirra. Hægt er að komast nær réttari niðurstöðu fyrir einstakan notanda með því að fara í eigin forsendur inni í reiknivélinni og slá inn í hvaða hlutföllum símtölin enda hjá símafyrirtækjunum.
- Símtöl til útlanda, símatorg, talhólf og möguleg sérþjónusta
Hjá símafyrirtækjunum er fjölbreytt þjónusta í boði sem viðskiptavinir nýta sér í misjöfnum mæli. Mjög mismunandi er hvort eða hvernig slík þjónusta er gjaldfærð og er því litið fram hjá slíkum þáttum í reiknivélinni.
- Netnotkun í farsíma
Sú þjónusta er tiltölulega skammt á veg komin, notendur hlutfallslega fáir og nota þjónusta lítið, a.m.k. enn sem komið er. Því er hún ekki tekin með í þessari útgáfu reiknivélarinnar, en PFS fylgist grannt með þróun á þessu sviði fjarskiptamarkaðsins eins og öðrum og mun taka þessa þjónustu inn í reiknivélina þegar tilefni er til.
FARA EFST Á SÍÐU
Forsendur útreikninga í Reiknivél PFS
Reiknivélin byggir á reglulegri gagnasöfnun PFS um fjarskiptanotkun viðskiptavina símafyrirtækjanna, þ.e. tölum um fjölda símtala, lengd símtala, hvert hringt er (þ.e hjá hvaða fyrirtækjum viðtakendur símtala eru), o.s.frv.
Við útreikninga er notuð aðferðafræði evrópska rannsóknarfyrirtækisins Teligen (www.teligen.com) sem hefur safnað og gefið út upplýsingar um gjaldskrár og verð fjarskiptafyrirtækja í yfir 30 ár.
Uppfærsla upplýsinga
Verðskrárupplýsingar reiknivélarinnar verða uppfærðar mánaðarlega hið minnsta, en oftar ef þörf er á, t.d. vegna verðbreytinga fjarskiptafyrirtækjanna eða tilkomu nýrra áskriftarleiða og/eða frelsisþjónustu. Reynt verður af fremsta megni að fylgja eftir slíkum breytingum svo reiknivélin skili á hverjum tíma sem réttustum niðurstöðum.
Dagsetning nýjustu uppfærslu er ætíð sýnileg efst í hægra horni vefsíðunnar.
Samstarf
Reiknivél PFS er alfarið á höndum og ábyrgð Póst- og fjarskiptastofnunar. Gerð hennar og þróun hefur þó byggst á samstarfi við ýmsa aðila innanlands og erlendis. Þar má nefna:
- Fjarskiptafyrirtæki innanlands sem láta í té þau gögn sem reiknivélin byggir á. Við gerð reiknivélarinnar voru fyrirtækin upplýst um framgang verksins og fengu frumdrög reiknivélarinnar til skoðunar og umsagnar á þróunartímabilinu.
- Hagsmunaaðila á sviði neytendaverndar, s.s. Neytendasamtökin, Neytendastofu og Talsmann neytenda.
PFS hefur átt gott samstarf við þessa aðila og notið fulls stuðnings þeirra við þróun reiknivélarinnar.
- Systurstofnanir á Norðurlöndum. PFS er í góðu samstarfi við systurstofnanir sínar á Norðurlöndunum sem hafa haldið úti sams konar reiknivélum, hver í sínu landi um árabil.
Tæknileg útfærsla og vefþróun
Sérfræðingar PFS sáu um þróun og uppbyggingu á reikniverki Reiknivélar PFS. Gerð vefsins www.reiknivél.is var í höndum Skýrr í samstarfi við sérfræðinga PFS.
Þróun
Sú reiknivél sem nú hefur verið birt er einungis fyrsta útgáfa Reiknivélar PFS. Reiknivélin verður í stöðugri þróun innan stofnunarinnar og nýjar útgáfur munu líta dagsins ljós á næstu misserum. Þar mun verða hægt að reikna með nýjum möguleikum þar sem þróun á fjarskiptamarkaði verður fylgt eftir. PFS mun auka gagnaöflun og rannsóknarstarf á fjarskiptamarkaði, m.a. vegna þessa.
FARA EFST Á SÍÐU