Á þessari síðu eru upplýsingar fyrir neytendur um ýmislegt sem varðar netþjónustu.
Flýtileiðir - smelltu á hlekk hér fyrir neðan til að komast beint í viðkomandi efni.
Samningar við fjarskiptafyrirtæki - ábyrgð, réttindi, skyldur
Samningur við fjarskiptafyrirtæki (Sjá lög um fjarskipti nr. 81/2003, 37. grein)
Áskrifendur fastasíma á einstaklingsmarkaði eiga rétt á samningi við fjarskiptafyrirtæki sem skal innihalda a.m.k. eftirfarandi atriði:
a. nafn og heimilisfang þjónustuveitanda,
b. þjónustu sem veita á, gæði hennar og tímann sem upphafleg tenging mun taka,
c. viðhaldsþjónustu sem boðin er,
d. nákvæmar upplýsingar um verð og gjaldskrá og hvernig hægt er að nálgast nýjustu upplýsingar um viðeigandi gjöld og viðhaldsgjöld,
e. gildistíma samningsins, skilmála fyrir endurnýjun hans og uppsögn,
f. skaðabætur og fyrirkomulag endurgreiðslu ef þjónusta er ekki í samræmi við samning,
g. hvernig hefja skuli mál til lausnar á deilum milli áskrifenda og fjarskiptafyrirtækis.
Fjarskiptafyrirtæki eiga að birta viðskiptaskilmála og gjaldskrá fyrir alla þjónustu sína á aðgengilegan hátt.
Binditími samnings
Óheimilt er í samningi að kveða á um lengri binditíma áskrifenda en sex mánuði. Eftir þann tíma er áskrifanda heimilt að segja upp samningi með eins mánaðar fyrirvara. Ákveði áskrifandi að færa viðskipti sín til annars fjarskiptafyrirtækis skal vera tryggt að þjónustuflutningur gangi greiðlega fyrir sig.
Uppsögn samnings vegna breytinga á skilmálum
Áskrifendur á einstaklingsmarkaði skulu eiga rétt á því að segja samningum fyrirvaralaust upp án greiðslu skaðabóta þegar þeir fá tilkynningu um fyrirhugaða breytingu á samningsskilmálum. Áskrifendum á einstaklingsmarkaði skal veittur a.m.k. eins mánaðar uppsagnarfrestur áður en breytingar taka gildi og skulu þeir jafnframt upplýstir um rétt sinn til að segja upp samningi að skaðlausu vilji þeir ekki samþykkja hina nýju skilmála.
Pakkatilboð
Fjarskiptafyritækin bjóða upp á mismunandi áskriftarleiðir, þ.á.m. svokölluð pakkatilboð þar sem fleiri þættir t.d. áskrift að heimasíma, farsíma og nettengingu eru settar inn í sama pakkann og eitt grunnverð greitt fyrir allt. Mismunandi er hvað felst í pökkunum, t.d. hve mikið niðurhal, símanotkun o.fl. Þess vegna er nauðsynlegt fyrir neytendur að meta sína eigin notkun, t.d. hvort Netið er notað mikið eða lítið, hvort mikið er sótt af efni á erlendar síður, hvort hringt er mikið eða lítið úr farsíma í annað símafyrirtæki og þá hvaða o.s.frv.
Ábyrgð fjarskiptafyrirtækja
Fjarskiptafyrirtæki geta í viðskiptaskilmálum sínum undanþegið sig bótaábyrgð á tjóni sem rekja má til sambandsleysis, rofs á fjarskiptum eða annarra truflana sem kunna að verða á rekstri fjarskiptaneta. Ábyrgðartakmörkunin er þó bundin við að tjónið verði ekki rakið til stórfelldra mistaka starfsmanna fyrirtækisins.
Kostnaður við ADSL tengingar - Reiknivél PFS
Á reiknivél PFS er hægt að sjá mánaðarverð á mismunandi þjónustuþáttum hjá fjarskiptafyrirtækjunum á hverjum tíma og reikna út hvað viðkomandi þáttur kostar einn og sér. Þar er ekki gert ráð fyrir pakkatilboðum og því þurfa neytendur að skilgreina notkun sína og sjá hvað hver þáttur kostar til að meta hvort og hvaða pakkatilboð hentar hverjum og einum.
Varðandi nettengingar reiknar reiknivélin eingöngu kostnað við ADSL nettengingar og erlent niðurhal. Notendur ADSL tenginga greiða almennt ekki fyrir niðurhal af innlendum vefþjónum.
FARA EFST Á SÍÐU
Ýmsar gerðir nettenginga
Fastlínu nettengingar
- ADSL háhraðanet
Hægt er að nýta hefðbundnar símalínur (kopar) og símanet til háhraðasendinga á gögnum til og frá viðskiptavinum sem eru í fastri áskrift. Notandinn þarf að fá ADSL beini (e. router) til að geta verið áskrifandi að ADSL-þjónustu sem felur í sér háhraðaflutning á gögnum og myndefni, gagnvirka margmiðlun og fl.
- Ljósleiðari
Ljósleiðarar hafa mestu flutningsgetu fyrir stafræn gögn í tvær áttir, þ.e. til og frá notandanum.
Á ljósleiðara er hægt að senda tugi sjónvarpsrása og stórar gagnasendingar fyrir gagnvirk samskipti. Verið er að leggja ljósleiðara á þéttbýlissvæðum hér á landi s.s. í Reykjavík og Akureyri. Enn sem komið er takmarkast gagnaflutningar á ljósleiðaranetum við hverfi og þéttbýliskjarna.
- Kapalsjónvarp
Dreifing á sjónvarpsefni er algeng breiðbandsþjónusta. Sjónvarpsrásum er þá dreift um lokuð kapalkerfi í fjölbýlishúsum, hverfum eða minni þéttbýliskjörnum. Kapalkerfin hafa í fæstum tilfellum verið uppfærð þannig að þau geti annað öðrum gagnaflutningum samhliða sjónvarpssendingum, en þó eru dæmi um að boðið sé upp á símaþjónustu og háhraðatengingar á kapalkerfum.
- Stafrænt sjónvarp
Með stafrænum sjónvarpssendingum opnast sá möguleiki að dreifa myndefni á nýjum leiðum t.d. um fastlínunetið, á ljósleiðara og með örbylgjusendingum í loftinu.
Þráðlausar nettengingar
- UMTS – háhraða-farþjónusta (3G)
Þriðju kynslóðar farsímakerfi hafa það umfram 2G ( GSM) að möguleiki til gagnaflutnings er margfaldur.
Með tilkomu þriðju kynslóðar farsíma opnast möguleiki á því að byggja upp háhraða-farnet um allt land. Kveðið er á um slíka uppbyggingu í fjarskiptaáætlun fyrir árin 2005-2010. Á háhraða-farnetum er hægt að vera sítengdur og í fjölþættum samskiptum samtímis í síma og á Netinu.
- WLAN – Þráðlaus net
Skammdrægar örbygjusendingar á þráðlausum netum geta haft mikla flutningsgetu og þykja henta vel fyrir fyrirtæki og stofnanir. Á þráðlausum netum er hægt að senda gögn á útvarpstíðnum sem eru ekki leyfisskyldar. Það ræðst af flutningsgetu um netgátt á Internetið hvaða burðargetu þráðlausa netið hefur. Þráðlaus net fyrir tölvunotendur hafa verið sett upp í mörgum bókasöfnum, á háskólasvæðum og í stórum verslunarmiðstöðvum.
FARA EFST Á SÍÐU
Magn niðurhals - að fylgjast með notkun sinni
Netþjónustufyrirtækin rukka viðskiptavini sína fyrir netnotkun. Oft er ákveðið magn netnotkunar innifalið í áskriftarleiðum. Einnig er mismunandi hvernig greitt er fyrir netnotkun eftir því hvaða tegund nettengingar er notuð.
Notandi með ADSL nettengingu greiðir fyrir niðurhal frá erlendum netþjónum. Ekki er greitt fyrir innlent niðurhal eða það sem sent er eða sótt.
Í gagnaflutningi á 3G farsímaþjónustu gildir almennt að allt gagnamagn er mælt. Bæði innlent og erlent, svo og gögn sem notandi sendir og sækir.
Netþjónustufyrirtækin mæla magn netnotkunar viðskiptavina sinna og notendur geta því fengið upplýsingar um notkun sína hjá sínum netþjónustuaðila.
FARA EFST Á SÍÐU
Öryggi og netnotkun
Netið er eins og hvert annað samfélag. Þegar Netið er notað er opnuð gátt út í ys og þys veraldarvefsins og þar eru glæpamenn eins og annarsstaðar. Því er nauðsynlegt að tryggja öryggi sitt eftir föngum m.a. með notkun eldveggja, vírusvarna og reglulegri uppfærslu forrita. Ýmsar upplýsingar eru aðgengilegar almenningi um leiðir til að efla netöryggi. Netþjónustufyrirtækin veita viðskiptavinum sínum ýmsar upplýsingar og auðvelt er að finna upplýsingar og leiðbeiningar á Netinu.
Íslenskir vefir um örugga netnotkun:
- Netöryggi.is - Aðgengilegar upplýsingar og leiðbeiningar fyrir almenning um hvernig hægt er að efla öryggi í netnotkun. Vefurinn er á vegum Póst- og fjarskiptastofnunar (PFS).
- Netsvar.is - hjálparvefur um örugga netnotkun þar sem hægt er að senda inn fyrirspurnir og fá svör við þeim. Vefurinn er samstarfsverkefni PFS, SAFT verkefnisins hjá Heimili og skóla og Barnaheilla.
- SAFT.is - vefur SAFT verkefnisins um örugga notkun barna og unglinga á Netinu og nýjum miðlum. Verkefnið er rekið af Heimili og skóla, landssamtökum foreldra.
FARA EFST Á SÍÐU
Útbreiðsla háhraðanettenginga
Útbreiðsla háhraðanettenginga hefur verið hröð á undanförnum árum og hröðust á stærstu þéttbýlisstöðum landsins. Nokkur svæði á landinu hafa þó orðið útundan í þessari þróun. Samkvæmt fjarskiptaáætlun 2005-2010, eiga allir landsmenn, sem þess óska að hafa aðgang að háhraðanettengingum. Fjarskiptasjóður hefur því boðið út uppbyggingu á háhraðanettengingum á þeim stöðum þar sem markaðsaðilar eru ekki eða ætla ekki að bjóða upp á háhraðanettengingar á markaðslegum forsendum.
Á vefsíðu Fjarskiptasjóðs er hægt að fylgjast með gangi verkefnisins.
FARA EFST Á SÍÐU
Kvartanir
Notandi sem vill kvarta yfir netþjónustu skal snúa sér til viðkomandi fjarskiptafyrirtækis.
- Kvörtun til Póst- og fjarskiptastofnunar
Telji notandi að fjarskiptafyrirtæki sem rekur netþjónustu hafi brotið gegn skyldum sínum samkvæmt lögum um fjarskipti eða gegn skilyrðum sem mælt er fyrir um í almennum heimildum, réttindum eða í rekstrarleyfi getur hlutaðeigandi beint kvörtun til Póst- og fjarskiptastofnunar um að hún láti málið til sín taka. Stofnunin skal leita álits viðkomandi fjarskiptafyrirtækis á kvörtuninni og jafnframt freista þess að jafna ágreining aðila á skjótan hátt. Náist ekki samkomulag skal úr ágreiningi skotið með ákvörðun. Ákvarðanir Póst- og fjarskiptastofnunar sæta kæru til sérstakrar nefndar, úrskurðarnefndar fjarskipta- og póstmála. Kæra skal berast nefndinni innan fjögurra vikna frá því að viðkomanda varð kunnugt um ákvörðun stofnunarinnar.
FARA EFST Á SÍÐU